Search

नमस्तेः रंगकर्मी भन्नु भयो कहिले देखि यस क्षेत्रमा लाग्नु भएको हो ?
पौडेलः रंगकर्म क्षेत्रमा मैले २०४३ सालदेखि एउटा हाँस्य पात्रबाट प्रवेश गरेको हुँ । पूर्णरुपमा मैले २०४७ देखि यो क्षेत्रमा निरन्तर लागिरहेको छु । रंगमञ्मा मेरो विधा भनेको नाटक हो ।

नमस्तेः तपाईले अभिनय गर्नुभएको पहिलो नाटकमा के को भुमिका गर्नुभएको थियो ?
पौडेलः मलाई सम्झना छ । २०४३ साल तिर हो हाम्रो ईन्द्रेणी पुस्तकाल थियो त्यसैले आयोजना गरेको एउटा नाटकमा मैले चना चटपटे वेच्ने व्यापरीको रोल गरेको थिए । जुन सुर्खेतमा त्यतिवेला चना चटपटे व्यापारीले भन्ने गरेको थेगो "पेक वाला पेकिङ्ग वाला हरिया मटर" थियो । हो मैले त्यसैको भूमिका गरेको थिए ।

नमस्तेः हाल सम्म तपाईले कतिवटा नाटकमा अभिनय गर्नुभयो र सन्तुष्टी प्राप्त भएको नाटक कुन हो नी ?
पौडेलः त्यस्तै करिव ६० जती पुग्यो होला मै अभिनय गरेको नाटकहरु र मैले सन्तुष्टी पाएको भनेको सायद सुर्खेतको पहिलो सडक नाटक नै भन्नुपर्ला "म भनेको हामी" भन्ने र "युगारम्भ" हो ।

नमस्तेः यो क्षेत्रमा तपाई विषेश कुन कलाकारबाट बढी प्रभावित हुनुहुन्छ ?
पौडेलः म विषेशत गुरुकुलका सुनिल पोखरेलबाट प्रभावित छु ।

नमस्तेः तपाईले नाटक लेखन निर्देशन गर्नुभएको छ कि छैन् ?
पौडेलः मैले लेखन निर्देशन गरेको छु । रेडियो नाटक, विज्ञापन नाटक, सडक नाटकहरु छन् भने म संलग्न रहेको संस्था आरंग नेपालबाट प्रशिक्षण पनि दिने गरेको छु ।

नमस्तेः रेडियो, सडक तथा रंगमञ्को नाटकमा भिन्नता के पाउनु भयो ?
पौडेलः रंगमंच र रेडियो नाटकमा थुप्रै भिन्नता छ, प्रस्तुतिकै कुरा गर्ने हो भने सडक तथा रंगमंचमा गरिने नाटकमा प्रशस्त तयारीहरु गर्नुपर्छ । सडक तथा रंगमन्चमा विग्रियो भने फेरी सपारे गर्छु भन्न सकिन्न तर रेडियोमा भने जति विग्रेपनी त्यसलाई सुधारेर गर्न सकिन्छ । त्यस्तै नाटक गर्ने स्थान एवं रंगमंचिय सामाग्री र भेषभुषा प्रयोगमा पनि भिन्नता छ। मंचं नाटकमा धेरै सामाग्री चाहिन्छ भने सडक नाटक म कम रेडियोमा यस्ता सामाग्रीको आवस्यकता पर्दैन। केबल स्वर एवं आवाजबाट नै सबै काम हुन्छ। त्यसैले मलाई सडक तथा रंगमञ्चको नाटक नै मनपर्छ ।

नमस्तेः नाटक के हो र किन गरिन्छ ?
पौडेलः नाटक भनेको समाजमा भएका बिभिन्न घटनाक्रम (सामाजिक , राजनैतीक आदी) को यथार्थ चित्रण जसलाई सम्बाद, अभिनय भेषभुषा एवं रंगमंचिय सामाग्रीका माध्यम्बाट दर्शक , श्रोता र पाठक सामु राखिन्छ।।

नमस्तेः तपाईले त चलचित्रमा पनि अभिनय गर्नुभयो नी पहिलो चलिचत्र कुन हो नी ?
पौडेलः हो मैले एउटा भिडियो र अर्को ठूलो पर्दाको चलचित्रमा अभिनय गरे मेरो पहिलो भिडियो चलचित्र जीवनकुमार शाक्यले निर्माण अनी गणेशभक्त गौतमले निर्देशन गर्नुभएको "ढुंगा जस्तो माया" हो भने ठूलो पर्दामा "बन्धकी" हो । पहिलो पटक "ढुंगा जस्तो मायामा" अभिनय गर्दा एउटा छुट्टै किसिमको पृथक अनुभव पाँए ।

नमस्तेः तपाईले अहिले सम्म अभिनय गर्नुभएको नाटकबाट कुनै अवार्ड पाउनु भएको छ ?
पौडेलः मैले अभिनय गरेका थुप्रै नाटकहरुलाई हामीले राष्ट्रिय स्तर सम्ममा मञ्चन गर्न अनी अवार्ड पाउन सफल पनि भएका छौं सामुहिक रुपमा तर व्यक्तीगत रुपमा कुनै अवार्ड हासिल गरेको छैन् ।

नमस्तेः तपाई एउटा नगरपालिकाको कर्मचारी पनि हुनुहुन्छ कसरी नाटक खेल्ने समय मिलाउनु भएको छ ?
पौडेलः मैले प्राय नाटकको लागि समय साँझको दिने गरेको छु । बाहिर जानु परेमा कार्यालयका अन्य साथीहरुलाई काम सिकाएर विदा लिएर जाने गरेको छु ।

नमस्तेः नगर पालिकाको कर्मचारी भएको नाताले कहिले काँही नगर क्षेत्रमा काम कारवाही गर्न जाँदा कुनै सम्झन लाएकका घटना छन् की ?
पौडेलः छन् नी कती पटक त्यस्तो भएको छ । कतीपयले भनेका छन् ओहो सर त यहाँ पनि नाटक खेल्न थाल्नु भयो की क्याहो भन्छन् । त्यस्तो वेला मैले भन्ने गर्छु हेर्नुस मेरो दुई वटा भुमिका छन् एउटा कलाकारिताको अर्को प्रशासनिक भनेर भन्ने गरेको छु ।

नमस्तेः सुर्खेतमा नाट्य क्षेत्रको अवस्था कस्तो देख्नु भएको छ ?
पौडेलः मैले यस्को बारेमा केही अध्ययनहरु पनि गर्ने मौका पाएको छु । जस अनुसार पुराना अग्रज भिमबहादुर बस्नेत, पदमबहादुर खड्का लगाएतका अनुसार सुर्खेतमा १९९० तिरपनि नाटकहुने गरेको पाएको छु । त्यसपछिका पिढीले पनि नाटकलाई अंगालेका छन् । तर यसैलाई कसैलेपनि पेशा बनाउन नसकिरहेको अवस्था छ ।

नमस्तेः तत्कालै कुनै नाटक गर्न लाग्नु भएको छ ?
पौडेलः हामीले आँउदो माघ २४ गते बालकृष्णसमको जन्म जयन्तीमा समकै एउटा नाटक गर्ने जमर्को गरेका छौ ।

नमस्तेः नाटक के हो र किन गरिन्छ ?
पौडेलः नाटक परिभाषा विभिन्न किसिमका छन् तर मलाई के लाग्छ भने नाटक भनेको वास्तवमा समाज, राजनैतिक लगाएत देशमा भैरहेको घटनाक्रमको चित्रण हो । जस्ले विभिन्न सकारात्मक सन्देशहरु प्रवाह गर्छ भने मनोरन्जन पनि दिन्छ । यसैका लागि पनि नाटक गर्ने गरिन्छ ।

नमस्तेः तपाईलाई सुर्खेतको नाट्य क्षेत्रमा मनपर्ने कलाकारको हुनुहुन्छ नी ?
पौडेलः सुर्खेतको सन्दर्भमा भन्नुपर्दा मेरो अग्रज र गुरु जस्ले मलाई समय समयमा सल्लाहहरु दिनुहुने श्री गणेशभक्त गौतम हुनुहुन्छ ।

नमस्तेः अन्तमा हाम्रो वेभसाईट मार्फत के भन्न चाहनु हुन्छ ?
पौडेलः अहिले जताततै प्रविधीको विकासको प्रभावले गर्दा आम मानिस चलचित्र, वेव लगाएत विभिन्न प्रविधी तर्फ आकर्षित भएका छन् । त्यसैले अभिनयको वास्तविक स्वाद लिनका लागि रंगकर्मलाई माया र सहयोग गरौं भन्न चाहन्छु ।

नमस्तेः आफ्नो व्यस्त समय निकालेर हामीलाई समय दिनुभयो त्यसकालागि तपाईलाई हार्दिक धन्यवाद ।
पौडेलः तपाईहरुलाई पनि धन्यवाद तपाईहरुको वेवसाईटमा केही कुरा राख्ने मौका दिनुभएकोमा साथै तपाईहरुको वेवसाईटको उत्तरोत्तर प्रगतिको कामना गर्दैछु ।

समाप्त